جورجیت ګانیون، په افغانستان کې د ملګرو ملتونو د همکارۍ هیأت سرپرست، د دوحې فورم غونډې په څنډه کې څرګنده کړه چې دغه هیأت د طالبانو او نړیوالې ټولنې ترمنځ د یوه پل په توګه فعالیت کوي.
میرمن ګانیون د هغو رسنیو سره په خبرو کې چې د طالبانو تر کنټرول لاندې دي، ټینګار وکړ چې د یوناما هڅې په افغانستان کې د نړیوال نظام سره د بیا ادغام او دې هېواد سره په مرستې د نړیوالو ژمنو د مراعت لپاره متمرکزې دي.
هغې زیاته کړه چې ملګري ملتونه هڅه کوي داسې زمینه برابره کړي چې افغانستان د نړیوالې ټولنې مسؤل غړی په توګه ومنل سي او له نورو هېوادونو سره مثبت تعامل ولري.
دا څرګندونې په داسې حال کې دي چې د طالبانو حکومت تراوسه د هېڅ هېواد له خوا په رسميت نه دی پېژندل سوی او نړیوالې اندېښنې د بشري حقونو، په ځانګړي ډول د ښځو او اقلیتونو د حقوقو په اړه، په افغانستان کې لا هم سته.
