ملګري ملتونه: په تیرو دریو میاشتو کې لږ تر لږه ۸۰۰ زره افغانان له افغانستانه وتلي دي

د معمار پرس د خبر له مخې؛ دا خبره د مهاجرت نړیوال سازمان په خپل تازه راپور کې کړې ده چی په تیرو دریو میاشتو کې څه باندې ۷۸۶ زره افغانان د رسمي لارو له لارې له افغانستان څخه مهاجر شوي دي. د دغه راپور له مخې چې نن خپور شو، له ۹۰ زرو څخه زیاتو افغان مهاجرینو له هیواد څخه د دوی د وتلو د لاملونو په اړه خبرې کړي دي. د دغو مهاجرتونو اصلي لاملونه د غوره اقتصادي فرصتونو لټون، امنیتي اندېښنې، روغتیايي خدمتونو ته لاسرسی او له کورنیو سره لیدنه ده. د درملنې د کم لګښت له امله، پاکستان د افغانانو د طبي مهاجرت یو له اصلي ځایونو څخه دی. دغه سازمان همداراز اټکل کړی، چې اوسمهال شاوخوا شپږ میلیونه افغانان په ایران او پاکستان کې ژوند کوي.