د معمار خبري آژانس د راپور له مخې؛ د ملګرو ملتونو د پراختیا پروګرام (UNDP) په خپلې وروستۍ ارزونې کې د افغانستان ټولنیز وضعیت په اړه اعلان کړی چې د بې سرپرسته ښځو شمېر ددې هیواد په ځینو ولسوالیو کې ۲۶ سلنې ته رسېږي، خو له دې ډلې یوازې شپږ سلنه ښځې کار کوي. د دغه راپور له مخې، چې د یکشنبې په ورځ، د قوس په نهمه خپور سوی، بې سرپرستې ښځې له ډېر سخت اقتصادي او ټولنیز حالت سره مخ دي او د عاید، سرپناه او اساسي خدماتو د برابرولو په برخه کې تر ټولو زیات فشار زغمي.
دغه بنسټ ویلي چې دا وضعیت د ښځو د زیاتېدونکي ناتوانۍ څرګنده نښه ده؛ په داسې حال کې چې د طالبانو پراخ محدودیتونه پر اقتصادي او ټولنیزو حقونو، د ښځو لپاره د کار او فعاله ګډون امکان تقریباً ناممکن کړی دی. دغه سازمان همدارنګه خبرداری ورکړی چې د دې وضعیت دوام کولی سي پراخ فقر، زیاتې انحصارۍ او ټولنیزه زیانپذیري د ښځو په منځ کې لا پسې زیاته کړي. په تېرو څلورو کلونو کې، په افغانستان کې ښځې له سختو محدودیتونو سره مخ سوې دي؛ د انجونو د زده کړو له بندیز نیولې تر ډېریو ادارو څخه د ښځو د ایستلو پورې، چې خصوصاً بې سرپرستې ښځې په خورا ناوړه اقتصادي وضعیت کې راګېرې کړې دي.
