د معمار خبري اژانس د راپور له مخې؛ د طالبانو د ویاند مرستیال، حمدالله فطرت، د سهشنبې په ورځ، د قوس ۲۵مه، د طالبانو د مشر پیغام خپور کړ. دا پیغام په کندهار کې د طالبانو د کار او ټولنیزو چارو وزارت، د سورهلال ادارې او د شهیدانو او معلولینو وزارت د مسؤلینو لپاره په یوه سمینار کې وړاندې سوی وو.
هبتالله اخوندزاده په خپل پیغام کې ټینګار کړی دی: «د طالبانو قوانین او فرمانونه د څو کسانو رأیه نه ده، بلکې د الله تعالی دین او ټول اسلامي احکام دي، چې خلک د الهي دین پر لور رابولي.»
د طالبانو مشر همدارنګه د دې ډلې له غړو غوښتي چې له داخلي اختلافاتو ډډه وکړي او ټول مسؤلین او ځواکونه دې صادر سوي فرمانونه د الهي حکمونو په توګه عملي کړي.
دا څرګندونې په داسې حال کې مطرح کېږي چې له څلورو کلونو راهیسې، د هبتالله اخوندزاده د فرمانونو له مخې، ښځې له زدهکړې، کار او ټولنیز ژوند څخه منع سوې دي او پر هغوی سخت محدودیتونه لګول سوي دي.
