د معمار خبري آژانس د راپور له مخې؛ مطیعالله ویسا، د افغانستان د ښوونې او د انجونو د زدهکړې د حقونو پېژندل سوی فعال، د فساد پر ضد د مبارزې لپاره د شیخ تمیم بن حمد آل ثاني د نهمې نړیوالې جایزې په لړ کې، «د ځوانانو د نوښت او ګډون» په برخه کې د جایزې ګټونکي په توګه وټاکل سو.
د فساد پر ضد د مبارزې لپاره د شیخ تمیم بن حمد آل ثاني د نهمې نړیوالې جایزې (ACE) د ورکولو مراسم د یکشنبې په شپه د قطر د امیر، شیخ تمیم بن حمد آل ثاني، په حضور کې د دوحې په ښار کې ترسره سول.
په دې مراسمو کې مطیعالله ویسا، چې د ښوونې په برخه کې فعال او د انجونو د زدهکړې د حق مدافع دی، «د ځوانانو د نوښت او ګډون» د برخې د ګټونکي په توګه معرفي سو او وستایل سو.
ویسا له کلونو راهیسې د زدهکړې د لاسرسي د پراخولو لپاره، په ځانګړي ډول د انجونو لپاره، فعالیت کوي او د طالبانو له واک ته رسېدو وروسته یې هم د انجونو د زدهکړې د حق د ملاتړ په موخه ګڼ مدني او پوهاويورکوونکي کمپاینونه پیل کړي دي.
دغه مدني فعال د ۱۴۰۲ کال په پیل کې د طالبانو له لوري ونیول سو او له څه باندې ۲۰۰ ورځو بند وروسته خوشې سو. د هغه نیول کېدو پراخ کورني او نړیوال غبرګونونه راوپارول.
د قطر امیر، شیخ تمیم بن حمد آل ثاني، په دې مراسمو کې په خپله وینا کې ټینګار وکړ: «د فساد پر ضد مبارزه یو نړیوال مسوولیت دی چې د نړۍ په کچه د نړیوالو بنسټونو همکارۍ او د ژمنو اشخاصو نوښتونو ته اړتیا لري.»
د قطر د امیر د فساد پر ضد نړیواله جایزه له ۲۰۱۶ میلادي کال راهیسې د هغو اشخاصو، بنسټونو او نوښتګرو طرحو د ستاینې په موخه ورکول کېږي چې د فساد پر ضد د مبارزې په ډګر کې اغېزمن فعالیتونه لري، او تر دې مخکې دا جایزه په ویانا، ژنیو، کوالالامپور، رواندا، تونس، دوحه، تاشکند او کوستاریکا کې هم ورکړل سوې ده.
