د معمار خبري آژانس د راپور له مخې، د طالبانو د حکومت ویاند ذبیحالله مجاهد اعلان کړی چې د داعش د یوه غړي نیول کېدل د ډیورنډ کرښې ته نېږدې، دا تائیدوي چې د دې ډلې مرکزونه د پاکستان په خاوره کې فعال دي.
د طالبانو حکومت ویاند ویلي، داعش د ډیورنډ کرښې هغې خوا ته پټنځایونه او مرکزونه لري، او طالبانو تر دې وړاندې هم راپورونه خپاره کړي چې دا ډله په پاکستان کې فعاله ده.
مجاهد د مخکینیو راپورونو ته په اشاره سره چې داعش د کرښې هاخوا فعالیت لري، څرګنده کړې چې د افغانستان دننه وروستي ترهګریز بریدونه د هېواد له پولو بهر طرحه سوي او مشري یې سوې ده.
نوموړي همداراز ادعا کړې چې دا ترهګره ډله په پاکستان کې ملاتړ کېږي او ټینګار یې کړی چې د داعش د ټولو مرکزونو له منځه وړل د سیمې د امنیت او ثبات لپاره ضروري دي.
د طالبانو ویاند زیاته کړه: «د داعش ټول پټنځایونه باید له منځه یووړل سي او هغه کسان چې غواړي له دې پدیدې څخه ناوړه ګټه واخلي، باید په خپلو سیاستونو کې بیاکتنه وکړي، ترڅو د سیمې امنیت او ثبات وساتل سي.»
دا څرګندونې داسې مهال کېږي چې په وروستیو میاشتو کې د افغانستان د حکومت چارواکو څو ځله پاکستان تورن کړی چې وسلهوالو ډلو ته یې پناه ورکړې او ملاتړ یې کوي؛ هغه تورونه چې تل د اسلامآباد له خوا رد سوي دي.
