د معمار خبري اژانس د راپور له مخې؛ پاکستاني چارواکو وویل چې زرګونه افغانان چې د امریکا د بیا استوګنې او لیږد په پروسه کې شامل وو، له دې هېواد څخه به وایستل سي. ددې پرېکړې له مخې، شاوخوا ۲۰ زره افغان کډوال چې امریکا ته د لیږد په تمه یې څو میاشتې تېرې کړي، اوس د اجباري بېرته راستنېدو په حال کې دي.
د خپرو سوو معلوماتو له مخې، ۱۹ زره ۹۷۳ افغانان چې اوس مهال په پاکستان کې ژوند کوي او امریکا ته د لیږد فعالې دوسیې لري، د دې پرېکړې په چوکاټ کې افغانستان ته ستانه کېږي.
یو باخبره سرچینې د یکشنبه په ورځ «نیشن» ورځپاڼې ته ویلي چې دا کسان به د «غیرقانوني بهرنیو اتباعو د بېرته ستنولو» پلان (IFRP) له مخې خپل هېواد ته ولیږدول سي. د دې سرچینې په وینا، وروستۍ پرېکړه د پاکستان د فدرالي حکومت په کچه سوې او د تطبیق امر یې په بیړنې توګه اړوندو ادارو ته ورکړل سوی دی.
د راپور له مخې، د پاکستان فدرالي حکومت به ډېر ژر د رسمي لیک له لاري د عملیاتو د پلي کولو امر د پنجاب، سند، خیبرپښتونخوا، بلوچستان، آزاد کشمیر، ګلګت-بلتستان ولایتونو لوړ پوړو چارواکو او د اسلامآباد د پایتخت سیمهييزو چارواکو ته واستوي.
سرچيني زیاته کړې چې امریکا ته د لیږد په تمه د ټولو ۱۹ زره ۹۷۳ افغانانو پېژندنیز معلومات به اړوندو امنیتي او اجراییه چارواکو ته ورکړل سي څو د بېرته ستنولو پروسه بې له ځنډه عملي سي.
د طالبانو د بیا واکمنۍ وروسته په ۲۰۲۱ کال کې، له ۱۰۰ زره ډېرو افغانانو پاکستان ته پناه وړې ده . د دې کسانو ډېری یې د امریکا او بریتانیا حکومتونو، نړیوالو سازمانونو او مرستندویه ادارو سره د مخکینۍ همکارۍ له امله د بیا استوګنې وړ ګڼل سوي دي .
په داسی حال کي ؛زرګونه افغانان په تېرو څلورو کلونو کې په پاکستان کې د نامعلوم وضعیت سره مخ وو او د دوسیو د بیاکتنې د ځنډ له امله، امریکا ته د لیږد هیله یې تر ډېره کمه سوې وه؛ هغه وضعیت چې اوس افغانستان ته د اجباري بېرته ستنېدو سبب سوي دي.
