قطر: د غزې اوربند باید د تلپاتې سولې دروازه شي

د معمار پرس د خبر له مخې؛ د قطر د بهرنیو چارو وزارت ویاند مجید الانصاري له الجزیرې سره په مرکه کې ټینګار وکړ چې په غزه کې د اوربند د تړون اصلي موخه د تلپاتې سولې لپاره د دروازې جوړول دي، او دوحه به اجازه ورنکړي چې دا تړون یوازې په یوه پړاو پورې محدود شي. هغه زیاته کړه چې د دې تړون لومړی پړاو، په ځانګړې توګه د بندیانو د تبادلې برخه کې، باید په بشپړ ډول او په بریالیتوب سره بشپړ شي ترڅو په راتلونکو پړاوونو کې د هغې د دوام لپاره لاره هواره شي. هغه همدارنګه ټینګار وکړ چې قطر د دې تړون په اړه شته نیوکو ته پام نه کوي او باور لري چې دا نیوکې به د عملي لاسته راوړنو په وړاندې له منځه لاړې شي. د اسراییلو رژیم او حماس ترمنځ د اوربند نوی تړون، چې د مصر، قطر او متحده ایالاتو تر څارنې لاندې پرې موافقه شوې ده، په لومړي پړاو کې د شپږو اونیو لپاره پلي کیږي. که چیرې اړخونه خپلو ژمنو ته غاړه کیږدي، نو تړون به دوهم او دریم پړاو ته داخل شي. د دې تړون لومړۍ مرحله به ۶۰ ورځې دوام وکړي، او د راتلونکو ګامونو جزئیات به د اړخونو ترمنځ په خبرو اترو کې وټاکل شي.