د معمار خبري آژانس د راپور له مخې؛ ریچارد بنیټ، د افغانستان د بشري حقونو په چارو کې د ملګرو ملتونو ځانګړی راپور ورکوونکی، د دې لپاره چې له نړیوالو دیپلوماتانو، قطري چارواکو او په هغه هېواد کې مېشتو افغانانو سره د افغانستان د بشري حقونو په اړه خبرې اترې وکړي، د قطر پلازمېنې دوحې ته روانېږي. په ژنیو کې د ملګرو ملتونو د دفتر د خبرپاڼې پر اساس، دا سفر د دسمبر له لومړۍ تر ۴مې پورې ترسره کېږي او موخه یې د افغانستان د بشري حقونو د وضعیت لا دقیقه ارزونه او د سیمې هېوادونو او نړیوالې ټولنې سره د افغانانو د حقونو د ملاتړ په اړه د نظرونو تبادله بلل سوې ده.
په دې سفر کې، ښاغلی بنیټ هڅه کوي چې د افغانستان د بشري حقونو د ملاتړ لپاره سیمهییز او نړيوال ملاتړ پیاوړی کولو لارې چارې ولټوي؛ په ځانګړي ډول په هغو برخو کې لکه د ښځو حقونه، د بیان آزادي، د مهاجرینو وضعیت او بېبنسټه نیونې. دا سفر داسې مهال ترسره کېږي چې په افغانستان کې د طالبانو تر واکمنۍ لاندې د ښځو پر وړاندې د محدودیتونو زیاتېدو، د مدني فعالانو د ځپلو او د بنسټیزو آزادیو د پراخو سرغړونو په اړه اندېښمنوونکې راپورونه په پرلهپسې توګه خپرېږي.
