د معمار پرس د خبر له مخې؛ د امریکایی مجلې “د هیل” په یوه مقاله کې، قاسم ژومارت توقایف د ملګرو ملتونو د امنیت شورا د اوسني جوړښت په بې کفایتۍ نیوکه وکړه، د نړیوال تصمیم نیونې سیسټم بیاکتنه او د نړیوالو کړکېچونو په اداره کولو کې د مخ پر ودې هېوادونو د رول پیاوړتیا یې وغوښتل.
په دې مقاله کې، د افغانستان کړکېچ ته په اشارې سره، د قزاقستان ولسمشر د هیواد د ننګونو د حل لپاره د سیمه ییزې تګلارې د غوره کولو اړتیا باندې ټینګار وکړ.
هغه وویل: “د سیمې خلک، په ځانګړې توګه افغانستان، د نړیوالو ادارو په پرتله ښه پوهیږي چې څنګه دوامداره سوله او ثبات ترلاسه کړي.”
هغه د دې طریقې د مثال په توګه په الماتا کې د دوامداره پراختیایي موخې لپاره د ملګرو ملتونو د سیمه ایز مرکز تاسیس ته اشاره وکړه، او زیاته یې کړه چې دا مرکز کولی شي د منځنۍ آسیا هیوادونو او افغانستان سره په ګډه د ستونزو په حل کې مرسته وکړي.
