فاطمه ګیلاني: خلیلزاد د افغانستان د روان بحران اصلي لامل دی

د معمار پرس د خبر له مخې؛ د افغانستان پېژندل شوې سیاسي څېره فاطمه ګیلاني د افغانستان د سولې لپاره د امریکا پخوانی ځانګړی استازی زلمی خلیلزاد د هېواد د روان وضعیت اصلي مسوول بولي. آغلي ګیلاني د دوحې پر تړون سختې نیوکې وکړې او دغه تړون یې د پخواني حکومت د سقوط او واک ته د طالبانو د راتګ اصلي لامل وباله. ګیلاني په یوه تونده وینا کې د دوحې تړون د افغانستان لپاره یو ناورین بللی، چې د تېرو دوو لسیزو لاسته راوړنې یې له منځه وړي، د میلیونونو خلکو د بې ځایه کېدو او د ښځو له اساسي حقونو څخه د محرومیت لامل شوی دی. هغه همداراز د طالبانو تر منځ د ژورو داخلي اختلافاتو او په دې ډله کې د واک د ویش شتون ته اشاره وکړه.