عزیزی بانک د انټرنېټ له وصلیدو وروسته خپلې چارې عادي حالت ته راګرځوي

د معمار خبري آژانس د راپور له مخې، عزیزی بانک په یوه رسمي خبرپاڼه کې څرګنده کړې چې په تېرو دوو ورځو کې د انټرنېټ د پرې کېدو له امله د دې بانک بانکي خدمات په مرکز او ولایتونو کې په موقتي ډول تړل سوي وو. په خبرپاڼه کې راغلي چې د انټرنېټ د بیرته وصلیدو وروسته، نن پنجشنبه ورځ د میزان له ۱۰مې، ټول بانکي خدمات د عزیزی بانک په ټولو څانګو کې بېرته عادي حالت ته ګرځیدلي دي. عزیزی بانک له خپلو مشتریانو غوښتي چې د اړتیا پر وخت له نن ورځ څخه وروسته خپل بانکي خدمتونه په عادي ډول ترلاسه کړي او د دوی له زغم او همکارۍ څخه یې مننه کړې ده. دغه اقدام به د مالي برخې بېرته ثبات او د بانکي معاملاتو اسانتیا په ټوله هېواد کې تضمین کړي.