عباس ستانکزی: رسنۍ په نننۍ ټولنه کې مهم رول لوبوي

د طالبانو د بهرنیو چارو وزارت سیاسي مرستیال عباس ستانکزي په کابل کې د ډلې له ویاندانو سره په یوه غونډه کې د رسنیو او معلوماتو ته د لاسرسي پر اهمیت ټینګار وکړ. دا څرګندونې په داسې حال کې راځي چې په افغانستان کې د طالبانو د واکمنۍ پرمهال پر رسنیو د سختو محدودیتونو او د خبریالانو د نیولو راپورونه خپاره شوي دي. د معمار پرس د خبر له مخې؛ د طالبانو د اطلاعاتو او کلتور وزارت یوه مطبوعاتي اعلامیه خپره کړه چې پکې یې اعلان وکړ چې دا غونډه د ویاندانو د ظرفیت لوړولو لپاره جوړه شوې وه. که څه هم ستانکزی د رسنیو د اهمیت په اړه خبرې کوي، راپورونه ښیي چې په تیرو دریو کلونو کې، په افغانستان کې سلګونه رسنۍ تړل شوي او زرګونه خبریالان له هیواده وتلي دي. په ډېرو ولایتونو کې ښځینه خبریالانې هم له رسنیزو فعالیتونو منع شوی دي.