د معمار خبري اژانس د راپور له مخې؛ د طالبانو د ادارې ویاند ذبیحالله مجاهد ویلي چې د دې ډلې د دفاع وزارت په چوکاټ کې له ۱۸۱ زرو څخه زیات کسان روزل سوي او دغو ځواکونو په پوځي روزنیزو دورو کې ګډون کړی دی.
د طالبانو ویاند د چهارشنبې په ورځ، د جدی ۱۰مه، د شمېرو په خپرولو سره ویلي چې د دې ډلې د دفاع وزارت د روزل سوو ځواکونو شمېر ۱۸۱ زره او ۸۴ کسانو ته رسېدلی دی.
هغه زیاته کړې چې په تېر یوه کال کې هم ۱ زر او ۳۰۰ نور کسان د جنایي امنیت، سرحدي او لوژستیکي برخو کې روزل سوي دي.
طالبان معمولاً خپل ځواکونه د لنډمهالو پوځي روزنیزو دورو له لارې جذب او روزي، خو د دغو روزنو د کیفیت په اړه کره او مفصل معلومات نه وړاندې کوي.
د طالبانو ویاند د طالبانو تر قوماندې لاندې د ټولو ځواکونو شمېر ته اشاره نه ده کړې، خو خپرې سوې شمېرې ښيي چې دغه ډله د خپلو امنیتي ځواکونو پر پیاوړتیا، په ځانګړي ډول د دفاع وزارت په رسمي چوکاټ کې، تمرکز کوي.
د روزل سوو جګړهمارانو د شمېر زیاتوالی په داسې حال کې رامنځته کېږي چې نړیوالو بنسټونو د ټولنې له حده زیاتې پوځي کېدو او د طالبانو په حکومت کې د قانوني او حسابورکوونکو جوړښتونو د نشتون په اړه اندېښنه څرګنده کړې ده.
