طالبان: په افغانستان کې بې روزګاري او فقر د بهرنیو لاسوهنو محصول دی

د معمار پرس د خبر له مخې؛ دا خبره د طالبانو مشر ملاحسن اخند په یوه خبرپاڼه کې کړې ده چی بې روزګاري، فقر او د افغانانو بدمرغي د څلور نیمو لسیزو جګړو او بهرنیو مداخلو پایله ده، چې د طالبانو رژیم په میراث پاتې شو. د طالبانو لومړي وزیر له هېوادونو او مرستندویه بنسټونو وغوښتل چې د کارموندنې په برخه کې د افغانستان له خلکو سره مرسته وکړي. هغه له خصوصي سکټور څخه وغوښتل چې په افغانستان کې د اقتصادي مسايلو د ودې لپاره دې له رامنځته شويو شرايطو ګټه واخلي. ملاحسن اخند په دوام وويل چې د څو لسيزو جګړو د خلکو د ژوند سيستم او زيربناوو ته ستر زيانونه اړولي دي. په دې لړ کې د طالبانو د کار او ټولنیزو چارو وزارت د کار پیدا کولو او د بې وزلۍ د کمولو په موخه د کارګرانو ملي کنفرانس جوړ کړ.