طالبان غواړي په افغانستان کې فیسبوک بند کړي

دا څرګندونې د طالبانو د مخابراتو او معلوماتي ټکنالوجۍ وزارت سرپرست نجیب الله حقاني د شنبې په ورځ (د حمل ۱۸مه) له خصوصي تلویزیون “طلوع نیوز” سره په مرکه کې وویل چی دغه وزارت په افغانستان کې د فیسبوک ټولنیزې شبکې د بندولو پلان نهايي کړی دی. هغه وویل: “زموږ ځوانان او ستاسو ځوانان په داسې حال کې دي چې دوی له علمي پلوه ضعیف دي او اکثریت یې بی‌سواد دي او بیا په دې شیانو [ټولنیزو شبکو] د وخت او پیسو ضایع کول د شرکت په ګټه او د ملت په زیان دي او د دې لپاره د فیسبوک د محدودولو او بندولو پالیسي جوړه شوې ده. د طالبانو د مخابراتو سرپرست وزیر د دغه پلان د عملي کېدو د نېټې په اړه معلومات ورنه کړل. خو دې ډلې تر اوسه په افغانستان کې د ټولنیزو شبکو د بندولو هڅه نه وه کړې.