طالبان: د بګرام د بېرته نیولو خبرې د افغانانو د احساساتو سپکاوی دی

«الاماره» وېبپاڼې په یوه تازه یاداښت کې لیکلي چې د بهرنیو ځواکونو د بېرته ستنېدو په اړه هر ډول خبرې، په ځانګړي ډول د بګرام هوایې اډې په اړه، د افغانستان پر ملی حاکمیت ښکاره تېری او د افغانانو د احساساتو سپکاوی دی. د راپور له مخې، امیرخان متقي، د طالبانو سرپرست حکومت د بهرنیو چارو وزیر، په جدی غبرګون کې ویلي: «د بهرنیو ځواکونو د بېرته راتګ موضوع، په ځانګړي ډول د بګرام یادونه، ښکاره تېری او د افغانستان پر خپلواکۍ ښکاره برید دی.» په یاداښت کې ویل سوي چې بګرام د افغانانو لپاره «د یرغل نښه» ده او دې اډې ته د بېرته ستنېدو یادونه د ملي احساساتو ښکاره سپکاوی ګڼل کېږي. دا یاداښت ټینګار کوي چې د افغانستان نننۍ اړتیا سوله، اقتصادي پرمختګ او د خلکو هوساینه ده. د طالبانو په وینا، که نړیواله ټولنه رښتینی تعامل غواړي، باید د پوځي طرحو پر ځای د سیاسي، اقتصادي او کلتوري همکاریو لاره خپله کړي. یاده دې وي چې ډونالد ټرمپ، تازه بیا د بګرام د بېرته نیولو پر «ضرورت» ټینګار کړی و. بګرام هغه مهال د امریکا تر ټولو لوی پوځي مرکز و چې په ۲۰۲۱ کال کې د بهرنیو ځواکونو له وتلو وروسته د کابل اوسنی حکومت ته وسپارل سو. طالبانو بیا بیا ویلي چې د افغانستان په خاوره کې د هېڅ هېواد پوځي حضور د منلو وړ نه دی او آن «یو انچ خاوره» هم بهرنیانو ته د استوګنې لپاره نه ورکوي.