طالبانو په هلمند کې د ژوندي موجوداتو د انځور او ویډیو خپرول منع کړل

د معمار خبري آژانس د راپور له مخې؛ ځايي سرچینې په هلمند ولایت کې وایي چې طالبانو په رسمي ډول د ژوندي موجوداتو اړوند ویډیوګانو او انځورونو خپرول او نشرول منع کړي دي. سرچینو د پنجشنبې په ورځ، د میزان پر درېیمه، رسنیو ته ویلي چې دا حکم د طالبانو د امر بالمعروف او نهی عن المنکر ریاست او د شکایتونو د رسیدګۍ ادارې له خوا په یوه غونډه کې صادر سوی دی. د راپور پر بنسټ، طالبانو په دې غونډه کې د امر بالمعروف د قانون د ۲۲مې مادې په استناد، د ژوندي موجوداتو د انځورونو او ویډیو خپرول د شریعت خلاف بللي او منع کړي یې دي. دغه بندیز چې مخکې یوازې رسنیو او دولتي ادارو ته متوجه و، اوس ټولې رسنۍ او د ټولنیزو شبکو کاروونکي هم رانغاړي. ځايي سرچینو همدارنګه ویلي چې یو شمېر فعالانو په ټولنیزو شبکو کې اعلان کړی چې د دې حکم له صادرېدو وروسته یې خپلې تصویري چارې درولي دي. دا په داسې حال کې ده چې له نږدې دوو اونیو مخکې، د طالبانو د امر بالمعروف ریاست په کندهار ولایت کې هم ورته حکم صادر کړی و او رسنۍ یې له دې کار څخه منع کړې وې.