د معمار خبری آژانس د راپور له مخې، د شنبې په ورځ، د قوس ۸ نېټه، د نورستان د طالبانو د معادنو رئیس ویلي چې په ټولیزه توګه ۸ زره ۷۸۵ کیلوګرامه ډبرې د ۱۱ میلیونه ۵۵۷ زره افغانیو په ارزښت پلورل سوې دي. د راپور په اساس، دا ډبرې د دوآب ولسوالۍ څخه استخراج سوي او پرته له دې چې د پلورونکو شرکتونو یا د پلور قانوني بهیر په اړه څه وویل سي، بازار ته وړاندې سوې دي.
نورستان ولایت د معدني سرچینو له پلوه غني سیمې ګڼل کېږي او په تېرو کلونو کې هم راپورونه خپاره سوي چې طالبان د دې زیرمو استخراج او پلور ترسره کوي. په ورته حال کې، د چاپېریال او طبیعي زیرمو کارپوهانو خبرداری ورکړی چې غیرمعیاري استخراج نه یوازې چاپېریال ته زیان رسوي، بلکې د پایدارې ودې او اقتصادي شفافیت فرصتونه هم له منځه وړي. همدارنګه، ځايي سرچینې او خپلواکه راپورونه په نورو ولایتونو لکه بدخشان او تخار کې د معادنو د پراخ لوټ راپور ورکړی؛ دغه بهیر بې له نظارت او نړیوالو قانوني چوکاټونو ترسره کېږي او د هیواد د طبیعی زیرمو څخه د طالبانو د سیاسي او مالي ګټې اخیستنې په اړه اندېښنې راپورته کړې دي.
