طالبانو په بامیان کې د شیعه ګانو په ښوونځیو کې د حنفي فقهې تدریس لازمي کړی دی

د معمار پرس د خبر له مخې؛ د بامیان ولایت د طالبانو د پوهنې ریاست د دغه ولایت د ښوونځیو مدیرانو ته امر کړی چې یوازې د حنفي فقهې پر بنسټ دیني زده کړې وکړي. دغه پرېکړه د باميانو د اوسېدونکو له غبرګونونو سره مخ شوې، ځکه چې په دغه ولايت کې ډېری زده کوونکي د شيعه مذهب دي او په تېرو وختونو کې په ښوونځيو کې جعفري فقه درس ورکول کېده. د ځايي سرچينو په وينا، طالبانو دا خبره منلې ده، چې د دواړو فقهو تدريس د اختلاف لامل کېږي او دا چې د کانکور ازموينه هم د حنفي فقهې پر بنسټ اخيستل کېږي، نو بايد په ښوونځيو کې دغه فقه تدريس شي.