د معمار خبري آژانس د راپور له مخې، د طالبانو د عامې روغتیا وزارت ویلي چې دا لومړي ځل دی چې په هېواد کې د «DNA» ازموینو لابراتوار جوړېږي. دا په داسې حال کې ده چې د پخواني حکومت د عامې روغتیا وزارت پنځه کاله وړاندې د ورته لابراتوار د جوړېدو خبر ورکړی وو.
مولوي نورجلال جلالي، د طالبانو د عامې روغتیا وزیر، د دې لابراتوار د پرانېستې په مراسمو کې وویل چې هڅې روانې دي څو د خلکو تشخیصي خدمتونو ته لاسرسی زیات سي او یو ثابت او پایدار روغتیايي سیستم رامنځته سي. نوموړي زیاته کړه چې ددې لابراتوار په فعالېدو سره به د عدلي طب په برخه کې ګڼې اسانتیاوې رامنځته سي.
جلالي وویل: «د دې لابراتوار په فعالېدو سره به د هغو مړو پېژندنه آسانه سي چې د ظاهري بڼې له مخې پېژندل یې ګران وي.» د پخواني حکومت د عامې روغتیا وزیر فیروزالدین فیروز په ۱۳۹۸ کال د حوت په میاشت کې اعلان کړی وو چې د «DNA» لابراتوار جوړ سوی او له دې لارې به د طبي، عدلي، قضايي او امنیتي برخو یو شمېر ستونزې حل سي. په تېر حکومت کې د عدلي طب ریاست د یو قرارداد له مخې د «DNA» ازموینې په کاناډا کې ترسره کولې.
طالبان په داسې حال کې د «DNA» لابراتوار د جوړېدو خبر ورکوي چې د افغانستان روغتیايي نظام د نړیوالو د مرستو د کمېدو له امله له سخت بحران سره مخ دی. د ملګرو ملتونو د معلوماتو له مخې، سلګونه روغتیايي مرکزونه د مرستو د پرېکېدو له امله تړل سوي او پاتې مرکزونه د وسایلو او کارکوونکو له کمښت سره مخ دي.
