طالبانو له ایران څخه وغوښتل چې د کډوالو لپاره اسانتیاوې زیاتې کړي

د معمار پرس د خبر له مخې؛ د طالبانو د سترې محکمې اداري مرستیال مولوي عبدالمالک الحقاني د ایران د کورنیو چارو وزارت د بهرنیو کډوالو د چارو د مرکز له مشر نادر یاراحمدي سره ولیدل او د کډوالو لپاره د سرشمیرنې فورمو د غځولو او د هغوی لپاره د اسانتیاوو د زیاتوالي غوښتنه وکړه. د غونډې په جریان کې، عبدالمالک حقاني ټینګار وکړ چې د طالبانو حکومت، د واکمنې ادارې د مشر د ځانګړي امر پر بنسټ، د انسانانو او مخدره توکو د قاچاقبرو ډلو په وړاندې په مبارزه کې له ایران سره همکارۍ ته ژمن دی. هغه همدارنګه په تیرو څلورو لسیزو کې د میلیونونو افغان کډوالو د پناه ورکولو په برخه کې د ایران د بشردوستانه اقدام ستاینه وکړه او د ګاونډیو هیوادونو ترمنځ یې د ښه ګاونډیتوب پر اهمیت ټینګار وکړ.