طالبانو له انګلیسي درسي کتابونو د ښځو انځورونه لیرې کړي

د معمار خبري آژانس د راپور له مخې، ځايي سرچینې په کابل پوهنتون کې وايي چې طالبانو د دې پوهنتون د انګلیسي ژبې او ادبیاتو د دیپارتمنت استادانو ته لارښوونه کړې چې له ټولو انګلیسي درسي کتابونو دې د ښځو انځورونه وباسي. د دغو سرچینو په وینا، دا امر د کتابونو او درسي مفرداتو د بیاکتنې له کمیټې څخه صادر سوی چې د طالبانو د سرپرست حکومت تر ادارې لاندې فعالیت کوي. سرچینې زیاتوي چې استادانو ته په شفاهي ډول خبرداری ورکړل سوی چې که له دې امر څخه سرغړونه وکړي، له جدي عواقبو سره به مخ سي. تر دې وړاندې هم طالبانو یو شمېر درسي او مرجع کتابونه د دې له امله چې د دوی په وینا د اسلامي شریعت «خلاف» دي، د پوهنتونونو او مکتبونو له تدریس څخه منع کړي وو. په تازه پېښه کې، سرچینې وايي چې د ښځینه لیکوالانو له خوا تألیف سوي کتابونه په پراخه کچه له نصاب څخه ایستل سوي دي.