د معمار پرس د خبر له مخې؛ د طالبانو د سرحدي پولیسو د عمومي ریاست ویاند عابدالله فاروقي په ټولنیزه شبکه ایکس کې اعلان وکړ چې د طالبانو سرحدي ځواکونو د کابل په نړیوال هوايي ډګر کې څلور چینایي اتباع د ۶۷۸ ګرامه خام سرو زرو د قاچاق په تور نیولي دي.
د هغه په وينا، دغو کسانو هڅه کوله چې دا اندازه سره زر له کابل څخه چين ته انتقال کړي.
په کابل کې د چین سفارت د دې پیښې په اړه د دې لیکنې تر وخته پورې غبرګون نه دی ښودلی.
طالبانو اعلان وکړ چې د دې قضیې په اړه څېړنې روانې دي.
دا پېښه وروسته له هغه رامنځته کېږي چې طالبانو مخکې اعلان کړی و چې دوی په ۱۴۰۳ کال کې د کابل هوايي ډګر او د هېواد د پولو له لارې د ۳۵۱ کیلوګرامه قیمتي ډبرو د قاچاق په مخنیوي کې بریالي شوي دي.
