د معمار خبري اژانس د راپور له مخې؛ هبتالله آخندزاده، د طالبانو مشر، په خپل تازه فرمان کې د بنګو د بوټي کرنه په ټول افغانستان کې منع اعلان کړی ده. ددغه امر له مخې، هېڅ وګړی په خپله مځکه کې د بنګو د کرني اجازه نه لري، او د سرغړونې په صورت کې به کروندې ورانې کړل سي او کرکوونکي به ونیول سي.
په امر کې دا هم راغلي دي چې د طالبانو د کورنیو چارو وزارت او د دوی نورې څارونکې او پلټونکې ادارې مکلفې دي چې سرغړونکي وپېژني، ونیسي او محکمې ته یې وسپاري.
دا امر د نشهيي توکو د کرني د کمولو لپاره د طالبانو د تګلارې د لړۍ یوه برخه ده؛ خو بیا هم نړیوالو ادارو اندېښنه ښوولې ده چې یوازې د تریاکو او بنګو پر کرنه بندیز لګول، د صنعتي نشهيي توکو لکه ښیښې (میتامفیتامین) د جوړېدو او قاچاق د ډېرېدو سبب ګرځېدلی دی.
د ملګرو ملتونو د نشهيي توکو او جرمونو ضد ادارې تر دې مخکې ویلي وو چې که څه هم د تریاکو کرنه ښکاره کمه سوی ده، خو په افغانستان کې د ښیښې جوړونه په بېساري ډول زیاته سوي ده ؛ هغه څه چې په سیمه او نړۍ کې د یوې نوې او غټې خطرې په توګه یادېږي.
د چارو پوهان باور لري چې د نشهيي توکو د اقتصاد سره رښتینې مبارزه یوازې هغه وخت کامیابه کېدای سي، چې د بدیلې کروندې اسانتیاوې، اقتصادي فرصتونه او د خلکو لپاره د کار او ګټې لارې برابرې کړل سي.
