طالبانو اعلان کړی چې د طالبانو د مشر له لوري د منسوب سوي فرمان پر بنسټ، د افغانستان د نفتو او ګازو د سرچینو پورې اړوند فعالیتونو د منظم کولو په موخه د «نفت او ګازو خپلواکه ادارې» په جوړولو کار روان دي.
د طالبانو د چارو ادارې رئیس، نورالحق انور، ویلي چې د دغه فرمان له مخې به شاوخوا اته ریاستونه او همدارنګه یو شمېر وزارتونه او ادارې چې تر دې وړاندې د نفت او ګاز په سکتور کې په بېلابېلو او پراخو جوړښتونو کې فعالیت کاوه، په نوي جوړښت کې سره مدغم سي.
د طالبانو د چارو ادارې رئیس زیاته کړه چې د دې ادارې د جوړولو موخه د فعالیتونو تمرکز، د کار د موثریت زیاتوالی او د هېواد د نفت او ګاز د سرچینو منسجم او منظم مدیریت دی.
د آمو دریا حوزه د افغانستان په شمال کې د نفت او ګاز له سترو حوزو څخه شمېرل کېږي، او د نړیوالو بنسټونو د ارزونو له مخې، ښايي په دې حوزه کې شاوخوا ۹۶۲ میلیونه ُبشکې خام نفت او نږدې ۵۲ ټریلیون مکعب فوټه طبیعي ګاز د استخراج وړ وي.
طالبانو په تېرو څو میاشتو کې له دې حوزې څخه استخراج سوي زرګونه ټنه نفت، د میلیونونو ډالرو په ارزښت پلورلي دي.
همدارنګه طالبانو د ۱۴۰۱ لمریز کال د حمل په ۱۹مه، د سرپل ولایت د قشقري سیمې د نفتو استخراج هم پیل کړ.
د دې ادارې جوړېدل په داسې حال کې کېږي چې طالبان هڅه کوي د افغانستان کورنۍ سرچینې لا ډېرې فعاله کړي، څو د دولت بودجه تأمین او پر بهرنیو مرستو خپله اتکا کمه کړي. تر اوسه د دې ادارې د جوړښت، صلاحیتونو او د مشرتابه د غړو په اړه نور جزیات نه دي خپاره سوي.
