د معمار پرس د خبر له مخې؛ د طالبانو د اقتصادي مرستیال مطبوعاتي دفتر د سې شنبې په ورځ (د حوت ۲۸مه) په یوه اعلامیه کې اعلان وکړ چې د دې ډلې د اقتصادي کمیسیون تخنیکي کمیټې د صادراتو په چارو کې دخیلو وزارتونو او څانګو لپاره د یو واحد سیسټم جوړولو پلان تصویب کړ.
د بیاکتنې وروسته، دا پلان د وروستۍ پریکړې لپاره اقتصادي کمیسیون ته راجع شوی دی.
د طالبانو په وینا، دا نوی سیسټم د صادراتو پروسې د ښه کولو لپاره ډیزاین شوی او د صادراتي اسنادو د جعل مخه به ونیسي.
په اعلامیه کې راغلي چې د دې پلان په پلي کیدو سره به د صادراتو لپاره اړین وخت او لګښت کم شي او د صادر شویو توکو لپاره تضمین شوی کریډیټ به هم زیات شي.
د طالبانو چارواکو ټینګار کړی چې دا نوښت به د افغانستان د صادراتو په زیاتولو کې مهم رول ولوبوي او د هیواد اقتصاد به پیاوړی کړي.
