د معمار پرس د خبر له مخې؛ د افغانستان د ولسمشرۍ پخواني ویاند صدیق صدیقي د هغو راپورونو په اړه سخت غبرګون ښودلی چې وايي ملګري ملتونه د طالبانو د وړاندیز شوي استازي سهیل شاهین ته د افغانستان د څوکۍ د سپارلو په اړه مشوره کوي.
د جمعې په ورځ، د ثور په ۱۲مه، هغه په ټولنیزه شبکه ایکس (پخوانی ټویټر) کې یو یادښت خپور کړ چې ټینګار یې وکړ چې له طالبانو سره هر ډول سیاسي تعامل، په ځانګړې توګه په نړیواله کچه، “د افغانانو سره یو ډول ښکاره خیانت دی.”
صدیقي لیکلي: “د طالبانو ډلې سره هر ډول تعامل، د خبرو اترو پیل، او سیاسي پروسه د غیرقانوني امتیاز یوه بڼه ده او د هغو افغانانو د حقونو سره خیانت دی، چې د طالبانو د ظلم، جبر او ویرې لاندې ژوند کوي.”
هغه د ملګرو ملتونو د کاري پروسې په نیوکه کولو سره وویل: “د ملګرو ملتونو څوکۍ مشروع حکومتونو ته ورکول کیږي، نه ترهګرو شبکو ته.”
