سید سکندر حسيني بامداد، د هېواد مشهور شاعر او لیکوال (او فرهنګي فعال)، د طالبانو د استخباراتو له خوا د یولس ورځني بند له خلاصون وروسته، په یوه پیغام کې د فرهنګيانو، د قلم څښتنانو او خلکو له پراخ ملاتړ څخه قدرداني کړې ده.
هغه په خپل پیغام کې لیکلي: «د هېواد د ارزښتمنې فرهنګي ټولنې، شاعرانو، لیکوالانو، عالمانو، فکري شخصیتونو، رسنیو، ګرانو ملګرو او هر هغه دوست ته چې په دې یولسو ورځو کې زما په اړه اندېښمن وو، درناوی او مننه وړاندې کوم… دا څو کلمې د دومره مېنې، محبت او درناوي د ځواب لپاره بسنه نه کوي.»
حسيني بامداد د خپل نیول کېدو لامل د فرهنګي مسایلو او د فردوسي عامه کتابتون د عامه خدمتونو په اړه یو «سوءتفاهم» بللی او زیاتوي: «د ځواب ویلو او د سوءتفاهم د رفع کولو لپاره مې یولس ورځې د طالبانو په استخباراتو کې تېرې کړې.»
هغه همدارنګه ټینګار کړی چې په دې موده کې هغه ته «هیڅ ډول ازار او اذیت» نه دی رسیدلی او لیکلي یې دي: «د استخباراتو (طالبانو) مامورینو له ما سره په درناوي چلند وکړ چې دلته یې مننه ضروري بولم.»
