د معمار خبری آژانس د راپور له مخې، کرولاین لیویت، د سپینې ماڼۍ ویاندې، اعلان کړی چې د متحده ایالاتو اوسني امنیتي ګواښونه د «افغانستان څخه راپورته سوي تروریزم» او په سومالیا کې د «شبکوالي درغلیو» پایله ده. نوموړې د یکشنبې په سهار، د قوس ۹مه، په خپل ایکس پاڼه لیکلي چې دا ګواښونه ښيي ډونالد ټرمپ د مهاجرینو په اړه «سم وایي».
اغلې لیویت زیاته کړه چې هغه «ستر امنیتي بحران» چې د امریکا پخواني ولسمشر جو بایډن په تېرو څلورو کلونو کې رامنځته کړی، نه د نادیده کېدو وړ دی او نه هم د مبالغې وړ. د هغې په وینا، ډونالد ټرمپ د خپل ټیم ټولو غړو ته لارښوونه کړې چې د دې «شر د ریښه ایستلو» لپاره د امریکا په دننه کې عملي اقدامات وکړي. دغه څرګندونې وروسته له هغه مطرح کېږي چې تېره اوونۍ یو افغان وګړی د رحمانالله لکنوال په نوم، د سپینې ماڼۍ په سیمه کې د امریکا ملي ګارد پر دوو غړو ډزې کړې وې چې له امله یې یو تن وژل سوی او بل سخت ټپي سوی دی.
