د معمار خبری آژانس راپور له مخی، د سويس د مهاجرت اداری اعلان کړی چې شاوخوا دوه اوونۍ وړاندې، يو افغان کډوال چې په مشخص جرم محکوم سوی وو، بیرته افغانستان ته لیږدول سوی دي.
د سويس د مهاجرت ادارې په وينا، دغه کس د جرم ترسره کولو له کبله د ایستلو په پرېکړه محکوم سوي او د هغه بيرته لېږدول د دغه هېواد د کورنیو قوانينو سره سم او د امنيتي شرايطو په پام کې نيولو سره ترسره سوي دی.
د سويس د مهاجرت اداری د دغه کس د پېژندګلوۍ، د نيولو ځای او د دوسیې د دقیقو جزئیاتو افشا کولو څخه ډډه کړې، خو ويلي دي چې د هغه بيرته لېږل د مجرمو کډوالو د چلند د پاليسۍ يوه برخه ده.
په همدې حال کې، د افغان کډوالو بيرته لېږدول د ځينو بشري حقونو بنسټونو له خوا تر نیوکې لاندی راغلی او د طالبانو تر واک لاندې په افغانستان کې د راستنيدونکو د امنيت په اړه اندېښنې راپورته کړی دی .
خو د سويس چارواکي ټینګار کوي چې په پرېکړو کې یی امنيت او حقوقو ارزونې په پام کې نيول کيږي.
