سور صلیب: زرګونه افغان کورنۍ د ژمي د سړې هوا له ګواښ سره مخ دي

د معمار خبري آژانس د راپور له مخې، د سور صلیب نړیوال فدراسیون خبرداری ورکړی چې که په راتلونکو اونیو کې بېړنۍ او اغېزمنې مرستې برابرې نه سي، زرګونه کورنۍ به په افغانستان کې د یو خورا سخت او د ژوند ګواښوونکي ژمي سره مخ سي. دغه بشردوستانه بنسټ د چهارشنبې په ورځ، د میزان ۹مه، اعلان وکړ چې په ځانګړي ډول هغه کورنۍ چې د وروستیو زلزلو له امله زیانمنو سیمو کې ژوند کوي، له جدي ګواښ سره مخ دي. د دغو ډېرو کورنیو لپاره لا هم مناسب سرپناه نه دی برابر سوی او د رانږدې ژمي یخنۍ کولی سي د انسانانو د تلفاتو کچه لوړه کړي. ددې فدراسیون په خپرې سوې اعلامیې کې راغلي چې تر اوسه نږدې ۹۰ زره کسانو ته بېړنی خدمتونه لکه روغتیایي پاملرنه، سرپناه، خوراکي توکي او نغدي مرستې برابرې سوې دي، خو اړتیاوې د موجودو امکاناتو په پرتله خورا پراخې دي. د سور صلیب نړیوال فدراسیون له نړیوالې ټولنې غوښتي چې د افغانستان د بشري کړکېچ د مخنیوي لپاره ژر او پراخ اقدامات وکړي. دا خبرداری په داسې حال کې ورکول کېږي چې د لرې پرتو سیمو ډېری خلک د شدید فقر، د مقاومو کورونو د نه لرلو او د خوړو د سرچینو د کمېدو له امله په خورا بې ثباته حالت کې ژوند کوي.