د معمار پرس د خبر له مخې؛ د سعودي عربستان د کورنیو چارو وزارت اعلان کړی چې د حمل له ۲۱مې څخه تر ۲۶مې پورې په ټول هیواد کې د ګډو امنیتي عملیاتو په ترڅ کې ۲۰،۶۶۸ غیرقانوني کډوال نیول شوي دي.
په دې عملیاتو کې د ۲۰۰۰ څخه زیاتو ښځو نیول هم شامل وو.
د کورنیو چارو وزارت د هغه راپور له مخې چې د یکشنبې په ورځ، د حمل په ۳۱مه خپور شو، د نیول شویو کسانو له ډلې څخه ۱۲،۳۳۷ د استوګنې قانون څخه د سرغړونې په تور، ۴،۷۵۰ د سرحدي امنیت قانون څخه د سرغړونې په تور او ۳،۵۵۵ د کار قانون څخه د سرغړونې په تور نیول شوي دي.
د کورنیو چارو وزارت راپور دا هم ښیي چې په دې موده کې، ۱،۲۶۴ کسان په غیرقانوني ډول د سعودي عربستان له پولو څخه د تیریدو په هڅه کې نیول شوي دي.
