د معمار خبري آژانس د راپور له مخې، ریچارد بنیټ په افغانستان کې د ملګرو ملتونو د بشري حقونو ځانګړي راپور ورکوونکي، د افغان خبریالانو او رسنیو څخه د نړیوالې ټولنې د دوامداره ملاتړ غوښتنه وکړه. هغه دا غوښتنه د جمعې په ورځ د بیان د آزادۍ په دریم نړیوال کنفرانس کې، چې په برلین کې جوړ سوی وو، څرګنده کړه. بنیټ چې په انلاین بڼه په دې غونډه کې ګډون کړی وو وویل، چې د بودجې او مالي سرچینو کمښت ګڼې افغان رسنۍ له جدي خطر سره مخامخې کړي او د دوی فعالیت یې له ستونزو سره مخ کړی دی.
نوموړي ټینګار وکړ چې رسنۍ او خبریالان په افغانستان کې د پېښو ثبتولو، د بشري حقونو د سرغړونو د افشا کولو او د خلکو د غږ د رسولو په برخه کې حیاتي رول لري؛ په ځانګړي ډول اوس چې طالبان په پراخه کچه د رسنیو پر ازادۍ محدودیتونه لګولي دي. ریچارد بنیټ له مرسته کوونکو هېوادونو، نړیوالو بنسټونو او د بیان د آزادۍ له ملاتړو وغوښتل چې د افغان رسنیو څخه خپل تخنیکي او مالي ملاتړ زیات کړي، څو دغه خپلواک غږونه چپ نه سي.
