د ۲۰۲۳ کال په وروستۍ ورځ له پاکستانه ۱۲۰۰ نور افغان کډوال شړل شوي دي

د معمار پرس د خبر له مخې؛ پاکستاني رسنیو خبر ورکړی، چې د ۲۰۲۳ کال په وروستۍ ورځ د دغه هېواد له پولو څخه ۱۲۰۰ ناقانونه افغان کډوال شړل شوي دي. د دغو راپورونو له مخې له پاکستانه د وتلو ټولټال شمېر ۴۵۵۶۴۵ ته رسېدلی دی. د پاکستان سما ټلویزیون راپور ورکړ چې د یکشنبې په ورځ (د دسمبر په ۳۱ مه) ۱۱۹۹ کسان د پاکستان له پولو څخه افغانستان ته ستانه شوي دي چې په دې کې ۳۸۹ نارینه، ۳۲۳ ښځې او ۴۸۷ ماشومان شامل دي. ویل شوي، چې په دغو مهاجرینو کې ۹۲ کورنۍ شاملې دي، چې په ۷۳ موټرو کې له پاکستانه افغانستان ته راستانه شوي دي.