د ښځو او نجونو پر وړاندې د طالبانو د بندیزونو د پایلو په اړه د ملګرو ملتونو خبرداری

د کډوالو لپاره د ملګرو ملتونو عالي کمېشنرۍ (UNHCR) دا خبرداری ورکړی چی د طالبانو لخوا لګول شوي محدودیتونو افغان میرمنې خورا زیانمنې کړې او بشري مرستو ته یې اړتیا زیاته کړې. دغه سازمان په یوه بیانیه کې چې د ثور په اتمه د شنبې په ورځ خپره شوه، ټینګار کړی چې په افغانستان کې ناوړه بشري وضعیت، د نړۍ له سترګو لرې او د رسنیو له نظره، د خرابېدو په حال کې دی. په افغانستان کې واک ته له ستنېدو وروسته طالبانو ښځې د زده کړو او کار له حقه بې برخې کړې او دې کار په دې هیواد کې بشري ناورین لا پسې زیات کړی دی. د ملګرو ملتونو د بشري چارو د همغږۍ دفتر (OCHA) د دغو خلکو د بیړنیو اړتیاوو د پوره کولو لپاره د ۳.۰۶ میلیارد ډالرو مرستې غوښتنه کړې ده