د ښاري ژوند کړکېچ؛ ملګري ملتونه: نړۍ دې د افغانستان پر ښاري زیربناوو پانګونه وکړي

د معمار خبري آژانس د راپور له مخې، د ملګرو ملتونو د بشر د استوګنې پروګرام د استوګنې نړیوالی ورځې په درشل کې له افغانستان څخه د بېرته ستنېدونکو د شمېر د زیاتوالي خبر ورکړی دی. یاد پروګرام د یک‌شنبې په ورځ، د میزان په ۱۳مه، د «استوګنې نړیوالې ورځې» په مناسبت په خپل ایکس‌پاڼه لیکلي چې دا حالت د ښاري ژوند د چټک زیاتوالی لامل سوی. ددې پروګرام په وینا، د بېرته ستنېدونکو مېشتېدل په ښارونو کې د لا مخکې کمزورو خدماتو پر وړاندې پراخ فشار رامنځته کړی دی. د ملګرو ملتونو د بشر د استوګنې پروګرام زیاته کړې: «داستوګنې په نړیواله ورځ، له خپلو شریکانو غواړو چې د حیاتي زیربناوو او بنسټیزو خدماتو په برخه کې پانګونه وکړي، تر څو د افغانستان ښارونه وکولای سي خپله وړتیا لوړه کړي، له شرایطو سره عیار سي، پرمختګ وکړي او د دوامدارې ودې پر لور ګام واخلي.» یاد پروګرام تر دې وړاندې هم ویلي وو چې د افغانستان پلازمېنه کابل د هېواد له ټول ښاري نفوس څخه تر ۴۰ سلنې زیات خلک پخپل منځ کې ځای پر ځای کړي دي. د دې ادارې د شمېرو له مخې، ډېری بېرته ستنېدونکي مهاجر په ښاري سیمو کې مېشتېږي، چې دا چاره د ښارونو د چټک پراختیا او د محدودو ښاري خدماتو پر وړاندې د فشار د زیاتېدو سبب سوې ده.