د معمار خبري آژانس له مخې: د پاکستان د ملي عوامي ګوند مرکزي شورا د افغانستان او پاکستان تر منځ د سوداګریزو لارو پر تړل کېدو نیوکه کړې، دا کړنه یې د خیبر پښتونخوا او بلوچستان سیمو پر اقتصاد «سخته ضربه » بللې او د دې لارو د ژر پرانیستلو غوښتنه یې کړې ده.
د دې شورا په تازه ناسته کې د شورا غړو ټینګار کړی چې د دواړو ایالتونو د زرګونو کورنیو ورځنی ژوند له افغانستان سره پر سوداګرۍ ولاړ دی، او د اسلامآباد او کابل تر منځ روانې تاوتریخجنی اړیکي د پولې دواړو غاړو ته اقتصادي او ټولنیزې ستونزې لا پسې ژوروي.
د پاکستان د ملي عوامي ګوند مرکزي شورا د افغانستان سره د اړیکو ترینګلتیا د سیمې سولې ته ګواښ بللی او څرګنده کړې یې ده چې د دې وضعیت دوام د ولس لپاره له زیان پرته بله کومه لاسته راوړنه نه لري.
دې ګوند ټینګار کړی چې جګړه د ستونزو حل نه دی، او د افغانستان او پاکستان واکمنې ادارې باید د یو بل د خپلواکۍ، ځمکنۍ بشپړتیا او واکمنۍ درناوی وکړي، او شخړې د خبرو اترو، ډیپلوماسۍ او رسمي ناستو له لارې پای ته ورسوي.
په وروستیو میاشتو کې د کابل او اسلامآباد اړیکي د پولې او امنیتي لانجو له امله ترینګلي سوي، او د سوداګریزو لارو تړل کېدو د سوداګرو، پوله مېشتو وګړو او سیمهییزو پانګوالو اندېښنې لا زیاتې کړي دي.
