د پاکستان لومړي وزیر له کابل سره سوداګرۍ ته د اسلام اباد چمتووالی اعلان کړ

د پاکستان لومړي وزیر شهباز شریف په یوه اقتصادي غونډه کې اعلان وکړ چې هېواد یې چمتو دی له افغانستان سره د “ترجیحي” سوداګرۍ په اړه خبرې وکړي. هغه زیاته کړه، له اذربایجان، افغانستان او نورو ښکېلو هېوادونو سره د ترجیحي سوداګریزو تړونونو په اړه مشورې روانې دي. شهباز شریف دغه راز د افغانستان له لارې له ازبکستان او تاجکستان سره د پاکستان سوداګري ګټوره وبلله، خو له افغانستان سره یې د ترجیحي سوداګرۍ په اړه نور جزئیات ورنه کړل. په داسې حال کې چې اسلام اباد له کابل سره د ترجیحي سوداګرۍ لپاره خپل چمتووالی اعلان کړی، د وروستیو کړکېچونو له امله له افغانستان سره د پاکستان سوداګري په وروستیو کلونو کې تر ټولو ټیټې کچې ته راټیټه شوې ده.