د معمار خبري اژانس د راپور له مخې؛ خواجه محمد آصف، د پاکستان دفاع وزیر، په تازه څرګندونو کې ویلي چې د افغانستان طالبان او د پاکستانی طالبانو غورځنګ ډله بېباوره ډلې دي او ادعا یې کړې چې دواړه له هند سره اړیکې لري.
آصف دا څرګندونې د سېشنبې په ورځ، د جدی ۱۶مه، د جیو نیوز خبري شبکې سره په مرکه کې کړې او خبرداری یې ورکړی چې که هند تهاجمي اقدام وکړي، پاکستان به هم متقابل غبرګون وښيي.
هغه همداراز ادعا کړې چې د خیبرپښتونخوا ایالت ځینو چارواکو د پاکستانی طالبانو غورځنګ غړو ته اجازه ورکړې ده چې له ځایي خلکو څخه په زور پیسې واخلي. دا تورونه په داسې حال کې مطرح کېږي چې په وروستیو میاشتو کې د پاکستان د دولتي بنسټونو او پاکستاني طالبانو ترمنځ ترینګلتیا زیاته سوې او پر پاکستاني امنیتي ځواکونو د دې ډلې بریدونه ډېر سوي دي.
د پاکستان دفاع وزیر د خپل هېواد امنیتي وضعیت ته په اشارې وویل چې د اسلاماباد حکومت د کورنیو او سیمهییزو ګواښونو په وړاندې روښانه دریځ لري او که اړتیا وي، لا پرېکنده اقدامات به هم ترسره کړي.
دا څرګندونې په داسې حال کې کېږي چې د پاکستان د دولت او پر افغانستان واکمنو طالبانو ترمنځ اړیکې په شدیده توګه ترینګلې سوې دي او دواړو لورو څو ځله یو پر بل د یاغي ډلو د ملاتړ تورونه لګولي دي.
