د معمار پرس د خبر له مخې؛ د پاکستان د پوځ مطبوعاتي دفتر اعلان وکړ چې د خیبر پښتونخوا ایالت په شمالي وزیرستان کې د پاکستان او افغانستان د پولې په اوږدو کې د “ناکام نفوذ هڅې” وروسته، د تحریک طالبان پاکستان (ټي ټي پي) اته جنګیالي ووژل شول او څلور نور وسله وال ټپیان شول.
د پاکستان پوځ له طالبانو څخه غوښتي چې د پولې مدیریت په بشپړه توګه ډاډمن کړي.
دا نښته د حمل ۱۶مه، د افغانستان پولې ته نږدې وشوه، او په سیمه کې د پاکستاني امنیتي ځواکونو عملیات لاهم روان دي.
د پاکستان پوځ په یوه اعلامیه کې اعلان وکړ چې د وسله والو یوه ډله چې هڅه یې کوله له پولې څخه تېر شي د شمالي وزیرستان په حسن خیل عمومي سیمه کې د امنیتي ځواکونو لخوا وپیژندل شوه او په نښه شوه.
