په هرات کې د طالبانو د حکومت د امر بالمعروف او نهی عنی المنکر ریاست چارواکو د بدنجوړونې د مرکزونو مسوولینو ته امر کړی چې د لویانو او تنکیو سپورټکوونکو لپاره جلا وختونه برابر کړي او په یو وخت یې د هغوی شتون منع اعلان کړی دی.
دې ادارې په یوه وخت کې د تنکيو ځوانانو او لویانو شتون «تحریککوونکی» بللی دی.
د طالبانو د امربالمعروف ریاست په هرات کې د بدنجوړونې روزونکو ته ویلي چې ورزشکاران دې په درېیو ګروپونو ووېشي، تنکي ځوانان، ځوانان او د پاخه عمر لرونکي کسان.
دغه ریاست د جېمونو مالکینو ته دا هم ویلي چې ورزشکاران دې د تمرین پر مهال موسیقي نه اوري او نه باید د لمانځه پر مهال تمرين وکړي.
امربالمعروف ریاست بدنجوړونکو ته ويلي، چې د تمرین پرمهال باید د درېشي پرځای عادي جامې واغوندي.
د هرات د امربالمعروف ریاست مشر «شیخ عزیز الرحمان» وايي: “موږ باید هغه څه وکړو چې خدای تعالی پر موږ فرض کړي، نو باید چې ټول بدن مو پټ وي.”
د بدنجوړونه په وروستیو کلونو کې په افغانستان کې خورا مشهوره شوې او په ښارونو کې یې ډېر جېمونه فعال شوي دي.
دا په داسې حال کې ده چې د طالبانو له خوا د پرلهپسې محدودیتونو له امله د ورزشکارانو په ګډون ډېرو نویو ځوانانو هېواد پرېښی دی.
