د معمار خبری آژانس د راپور له مخې؛ د «نی نهاد په تبعید کې، چې د افغانستان د رسنیو د ملاتړ له بنسټونو څخه دی، په پاکستان کې د افغان خبریالانو د ناوړه وضعیت په اړه د اندېښنې په څرګندولو سره، د یوه رسمي لیک له لارې د پاکستان له لومړي وزیر شهباز شریف څخه غوښتي چې د دې کړکېچ د حل لپاره مستقیمه مداخله وکړي.
یاد بنسټ د سېشنبې په ورځ، د جدی ۲مه، په خپل لیک کې ویلي چې افغان خبریالان په پاکستان کې د پولیسو لهخوا د نیول کېدو له ګواښ، د تګراتګ له سختو محدودیتونو او د قانوني خوندیتوب له نشتوالي سره مخ دي او عملاً د کورني بند په څېر وضعیت کې ژوند کوي.
د «نی» په لیک کې راغلي چې یو شمېر افغان خبریالان د ویزې د نشتون یا د هغې د نه تمدید له امله نیول سوي یا بېرته افغانستان ته شړل سوي دي؛ هغه ځای ته چې هلته په مستقیم ډول د طالبانو له ګواښ سره مخ دي.
د نی نهاد له پاکستاني حکومت څخه غوښتي چې افغان خبریالانو ته بشردوستانه ویزې ورکړي، د امنیتي ادارو لهخوا د هغوی د ځورونې مخه ونیسي، او د خبریالانو او د هغوی د کورنیو لپاره د ژوند او حقوقي مصونیت تضمین برابر کړي.
دا غوښتنه په داسې حال کې مطرح کېږي چې د پاکستان او طالبانو ترمنځ د تاوتریخوالي له زیاتېدو وروسته، د افغان کډوالو د ایستلو بهیر چټک سوی او د هغوی د ویزو تمدید هم درول سوی دی.
په همدې حال کې، د پاکستان یوه سناتور هم د پناهغوښتونکو، په ځانګړي ډول د افغان روشنفکرانو، رسنیزو کارکوونکو او ښځو د ناوړه وضعیت په اړه اندېښنه څرګنده کړې ده.
