د معمار خبري اژانس د راپور له مخي؛ د طالبانو ادارې اعلان کړي چي ، د افغانستان د کانونو د کیندلو په دوام، یو ځل بیا د پنجشیر زمردو او د نورستان د قیمتي ډبرو د پلور خبر ورکړل سو.
د دې ادارې د مسؤلینو په وینا ، د سه شنبې په ورځ د پنجشیر له کانونو څخه ۷ زره ۵۱۳ قیراطو زمرد چې ارزښت یې له ۶ میلیونه افغانیو زیات وو، او د نورستان ۱۱ زره ۶۸۷ کیلوګرامه قیمتي ډبرې چې ارزښت یې له ۱۱۳ میلیونه افغانیو زیات وو، وپلورل سوي.
رحیم عمیر، په نورستان ولایت کې د طالبانو د کانونو او پترولیم رئیس ، وویل چې دا ډبري د کنزیت، بیروج، بلور او مارگنیت ډولونه لري او د ماوي ولسوالۍ د دواب کانونو څخه کيندل سوي دي. هغه زیاته کړه چې د دې ډبرو له پلور څخه ۱۱ میلیونه ۳۵۶ زره افغانی د طالبانو د ادارې خزانې ته ليږدول سوي دي.
طالبانو په خپلې څلور کلنۍ واکمنۍ کې په افغانستان کې د طبیعي سرچینو په کیندلو او د هغو پر پلور تمرکز کړی دی. نيوکه کوونکي دا پروسه غیر مسلکي او غیر قانوني ګڼي او وایي چې ددې کانونو د پلور عایدات د ملي پانګونې پر ځای د طالبانو د واک د ټینګښت لپاره کارول کیږي.
مخکې له دې په پنجشیر ولایت کې د کانونو او پترولیم ریاست اعلان کړی و چې په روان کال کې په دې ولایت کې د ۲۶۰ څخه زیات نوي د زمرد کانونه موندل سوي دي.
