د معمار پرس د خبر له مخې؛ لیونل میسي، د ارجنټاین سټرایکر او د انټر میامي سوپر سټار، یو ځل بیا د فوټبال په تاریخ کې خپل نوم تلپاتې کړ.
د ټیم په وروستۍ لوبه کې د دوو ګولونو په وهلو سره، هغه د خپلو غیر جریمې ګولونو ټولټال ۷۶۴ ګولونو ته لوړ کړ او د پرتګال د ۴۰ کلن کپتان کریسټیانو رونالډو څخه یې هم مخکې شو، چې ۷۶۳ غیر جریمې ګولونه یې وهلي دي.
دې نوې لاسته راوړنې د فوټبال په تاریخ کې د یو له غوره ګول وهونکو څخه د میسي دریځ نور هم پیاوړی کړ.
د فوټبال د نړۍ د دوو افسانوي لوبغاړو، میسي او رونالډو ترمنځ اوږدمهاله سیالي تل د مینه والو پام ځانته اړولی دی، او دا ځل، په دې ریکارډ کې د میسي مخکې تګ یو ځل بیا د دواړو ستورو ترمنځ د غوره والي په اړه بحث ګرم کړی دی.
