د ملګرو ملتونو چارواکو پر طالبانو د سمدستي بندیزونو غوښتنه کړې

د معمار پرس د خبر له مخې؛ د یوریشیا ریویو د راپور له مخې، د ملګرو ملتونو چارواکو په دغه راپور کې ټینګار کړی چې طالبان نه یوازې دا چې د یوه ټول شموله حکومت د جوړولو او بشري حقونو ته د درناوي په برخه کې خپلې ژمنې نه دي پوره کړي، بلکې د سختو او ظالمانه سیاستونو په پلي کولو سره یې د میلیونونو خلکو ژوند له خطر سره مخامخ کړی دی. ملګرو ملتونو په یوه نوي راپور کې د افغان ولس په ځانګړې توګه د ښځو پر وړاندې د طالبانو پر ظالمانه سیاستونو سختې نیوکې کړې دي او د دغې ډلې پر وړاندې یې د سمدستي بندیزونو غوښتنه وکړه. دا غوښتنه پر مدني ټولنو د طالبانو د فشار له زیاتېدو، د ښځو پر حقونو د پراخو بندیزونو او د سیاسي مخالفینو تر ځپلو وروسته شوې ده. نړیوالې ټولنې هم له دې غوښتنې څخه په کلکه ملاتړ کړی دی.