د معمار خبري اژانس د راپور له مخې، د ملګرو ملتونو د بشري استوګنې پروګرام ویلي چې ګڼ افغانان پاکو اوبو او روغتیايي خدمتونو ته لاسرسی نه لري؛ هغه وضعیت چې د خلکو روغتیا او ژوند یې له جدي ګواښ سره مخ کړی دی.
یاد بنسټ په اېکس ټولنیزه شبکه کې پر خپلې رسمي پاڼې لیکلي چې افغانستان دا مهال د اوبو د بحران په لومړۍ کرښه کې قرار لري او د پاکو اوبو کمښت، په ځانګړي ډول په غیررسمي مېشتځایونو او محرومو سیمو کې، د دغو سیمو د اوسېدونکو لپاره جدي روغتیايي خطرونه رامنځته کړي دي.
ملګري ملتونه ټینګار کوي چې پاکې اوبه نه یوازې د روغتیا د تأمین لپاره حیاتي ارزښت لري، بلکې د انساني کرامت د ساتنې او د خلکو د ژوند د کیفیت د ښهوالي لپاره هم مهم رول لري.
د ملګرو ملتونو د بشري استوګنې پروګرام په دې تړاو ویلي دي:
«موږ باید د ټولو لپاره د پاکو اوبو او روغتیايي خدمتونو د برابرولو هڅې لا زیاتې کړو.»
تر دې وړاندې، د ملګرو ملتونو د ماشومانو ملاتړ صندوق (یونیسف) هم راپور ورکړی وو چې د افغانستان د میلیونونو وګړو لپاره پاکو اوبو ته لاسرسی په جدي ډول محدود سوی او د دغه راپور له مخې، له هر لسو افغانانو څخه اته تنه له ککړو اوبو ګټه اخلي.
