د معمار خبري آژانس د راپور له مخې، د افغانستان د ژغورنې لپاره د ملي مقاومت عالي شورا په یوه اعلامیه کې ویلی چې په واشنګټن کې پر دوو د امریکا د ملي ګارد سرتېرو برید «یوه انفرادي ترهګریزه حمله» ده او دا پېښه باید د ټول افغان ملت په اوږو بار نه سي. په اعلامیه کې ویل سوي: «د افغانستان خلک د کلونو جګړو او ترهګرۍ قربانیان دي. د یوه کس د عمل له امله د ټول ملت مجازات کول د عدالت، اخلاقو او حقوقي اصولو خلاف دي.»
دې شورا د امریکا د هغه راپورونو په اړه جدي اندېښنه ښودلې چې د افغانانو د کډوالۍ دوسیو ارزونه سمدستي ځنډول سوې، او خبرداری یې ورکړی چې دا پرېکړه کولی سي «سلګونه بېوسه وګړي چې د طالبانو له واکمنۍ تښتیدلي، د یو نوي بشري بحران سره مخ کړي.» ملي مقاومت د ډونالډ ټرمپ وروستۍ څرګندونې هم «د اندېښنې وړ» بللې او ټینګار یې کړی: «طالبان او د دوی سیمهییز ملاتړي دي چې افغانستان یې په دوزخي کندې بدل کړی، نه د افغانستان خلک چې د دې ظالم او ترهګریز جوړښت اصلي قربانیان دي.»
په اعلامیه کې د امریکا له حکومت غوښتنه سوې چې د کډوالۍ په پرېکړو کې دې د افغانستان د خلکو او طالبانو ترمنځ «روښانه او پرېکنده تفکیک» وکړي او «قرباني ته دې د مجرم پر ځای سزا نه ورکوي.» شورا زیاتوي چې د افراطیت او تاوتریخوالي ریښه د طالبانو تر واک لاندې فعالو ترهګریزو شبکو کې ده؛ هغو ډلو ته چې «هیواد یې د نړیوالو ترهګرو خوندي پناه ځای ګرځولی او د سرحدونو هاخوا د تاوتریخوالي د صادرېدو زمینه برابروي.» په پای کې ملي مقاومت شورا ټینګار کوي چې دا بنسټ د یوه پراخ سیاسي چتر په توګه، د طالبانو تر واک لاندې د ترهګرۍ له ګواښونو سره د مبارزې لپاره د نړیوالو شریکانو همکارۍ ته تیار دی.
