دغه غونډه د تشکيلاتو او معاشونو تنظيم کمېسيون غړو، د ملي دفاع او کور او ښار جوړولو وزارتونو او د افغانستان د مخابراتي خدمتونو د تنظيم ادارې (اترا) د باصلاحيته او مسلکي استازو په شتون کې ترسره شوه.
په غونډه کې د تېر کال پر تشکيل، مالي پلان، کړنو، لاسته راوړنو، امتيازي معاشونو، NTA او د يادو ادارو پر بالمقطع سهميې هر اړخيز بحث وشو.
همداراز ملي دفاع وزارت ته وويل شول، چې د بې سرنوشته مجاهدينو د ثبت او ګمارنې په برخه کې اقدام وکړي او مجاهدين پر بستونو وګماري.
په یاده غونډه کې همدارنګه کور او ښار جوړولو وزارت مکلف شو، ترڅو په معياري ډول د ښاري پراختيا په برخه کې هڅې وکړي او پر اترا ادارې ټينګار وشو، چې له مخابراتي خدمتونو څخه محرومو لرې پرتو سيمو ته د مخابراتي خدمتونو برابرولو لپاره کوټلي ګامونه واخلي.
د یادونې وړ ده، چې د تشکیلاتو او معاشونو د تنظیم کمېسیون په پرونۍ غونډه کې همدارنګه د پيلوټانو، انجينرانو، تخنيکرانو، روغتیايي کادرونو او نورو مسلکي برخو په اړه هر اړخيز بحث وشو او په پای کې لازم تصميمونه ونيول شول.
