د «د لمر لاندې باران» کتاب چې د سید اسحاق شجاعي اثر دی، د افغانستان او ایران د ادب مینهوالو، شاعرانو، لیکوالانو او فرهنګي شخصیتونو په ګډون په یوه صمیمي فرهنګي غونډه کې د افغانستاني مهاجرینو په فرهنګي ـ ټولنیز بنسټ کې په تهران کې معرفي سو. د «د لمر لاندې باران» کتاب چې د سید اسحاق شجاعي اثر دی، د معرفت مراسم یې د دوشنبې ورځ، ۱۰ د قوس په ماښام ترسره سوه. په دې مراسمو کې د افغانستان فرهنګپالان، شاعران، لیکوالان، او د ادب مینه وال راټول سوی وه ترڅو ددې لیکوال د کتاب ستاینه وکړي. حسین حیدربيګي، د افغانستان لیکوال او فرهنګي فعال، د کتاب ځانګړتیاوې وړاندې کړې او وویل چې کتاب په ۵۱۵ پاڼو کې خپور سوی، د کتاب پوښ محسن حسيني ډیزاین کړی او د پاڼو ترتیب محمدکاظم کاظمي ترسره کړی دی.
هغه د کتاب د کیفیت په اړه وویل چې د غوره کاغذ کارول او د کتاب مناسب فونټ انتخاب، د دې اثر مثبت اړخونه دي. حیدربيګي د یوې څېړنیزې لیکنې د ځانګړتیاوو په اړه وویل: «هره څېړنه باید مشخص هدف او چوکاټ ولري، او لیکوال په دې کتاب کې د اسلام د پیغمبر سیرت معرفي کړې دي.» هغه زیاته کړه چې نن ورځ ډیری مسلمانان له «کاریکاتوري اسلام» سره مخ دي او د پېغمبر د عملي سیرې له پامه غورځول د افراطي چلندونو لامل سوی دی. د کتاب په ۲۱ فصلونو کې، هر فصل د پېغمبر یوې ځانګړتیا ته ځانګړی سوی او لیکوال هڅه کړې چې تاریخي کیسې، دیني روایتونه او د پېغمبر ژوند په روانه او د کیسې په بڼه وړاندې کړي، چې دا کتاب د لوستلو وړ ګرځوي. دې فرهنګی فعال زیاته کړه: چې کتاب د کیسې په بڼه لیکل سوی، خو مذهبي ناول نه دی؛ بلکې تاریخي اثر دی چې د کیسې په بڼه وړاندې سوی، او څېړنیزه بڼه یې هم ساتل سوې ده.
هغه د کتاب نثر ساده او روان وبله او وویل چې «برعکس د ډېرو دیني متونو چې نثر یې دروند دی، دا اثر په ساده او روانه ژبه لیکل سوی دی.» حجتالاسلام حسینی حنیف په دې مراسمو کې د دیني اخلاقو اهمیت یاد کړ او وویل: «د دیني اخلاقو پابندي یو واجب عمل دی او هر څومره چې انسان د دیني فکر سره تړاو ولري، عمل یې له کمی او کیفي نظره وده کوي.» هغه وویل چې که دیني اخلاق د عاطفي اړخونو سره یوځای سي، فکري استحکام او د دیني تعلیماتو پابندي زیاتېږي. حسینی حنیف همدارنګه وویل چې هر څومره د پېغمبر په اړه څېړنه وسي، بیا هم کافي نه ده، او څومره چې مطالعه زیاته وي، د پېغمبر سره مینه او معرفت زیاتېږي.
هغه وویل چې لیکوال د «د لمر لاندې باران» کتاب کې د پېغمبر ځانګړتیاوې د معتبره منابعو پر اساس راټولې کړې دي او د پېغمبر وینا هم روانه او پوهېدونکې ښودل سوې ده. سید اسحاق شجاعي، د کتاب لیکوال، د افغانستاني مهاجرینو د فرهنګي ـ ټولنیز بنسټ له ملاتړ څخه مننه وکړه او ویې ویل چې داسې مراسم لیکوالان هڅوي او د ادبي آثارو پیژندل کېدو کې مرسته کوي. هغه زیاته کړه: «کله چې کتاب چاپ سي، خپلواکه هویت ترلاسه کوي، نو زه یوازې څو ټکي یادوم.» شجاعي وویل چې د پېغمبر سیرت ته په کتنه کې د جذابو او بامحتوا کیسو سره مخ کېږي، چې هره یوه د پېغمبر مختلفې او اغیزناکې ځانګړتیاوې څرګندوي. لیکوال د پېغمبر اخلاق د مسلمانانو د چلند د ارزونې لپاره یوه کړکۍ وبلله او ټینګار یې وکړ چې «باید وګورو زموږ چلند د پېغمبر د سیرت سره څومره ورته دی.
موږ مسلمانان یو، خو باید فکر وکړو چې څومره د هغه ځانګړتیاوې او احکام عملي کوو، په داسې حال کې چې زموږ ټولنیزې ستونزې زیاتېږي.» شجاعي د کتاب د لیکلو او خپرولو هدف د پېغمبر د اخلاقو او عملي سیرت خپرول وبلل او هیله یې وښوده چې دغه اثر به د اسلامي تعلیماتو په پیژندنه او عملي کولو کې مرسته وکړي. دغه مراسم د سید اسحاق شجاعي د علمي او ادبي هڅو په ستاینه پای ته ورسېدل، کتاب چې د ګډونوالو په باور، د دیني څېړنې او داستاني روایت ترمنځ یو نوی پل جوړوي او نوې نسل ته د پېغمبر(ص) سیرت په روانه ژبه معرفي کوي. ددې کتاب معرفت نه یوازې د یو اثر د معرفی کولو یو فرصت وو، بلکې د اخلاقو، پیژندنې، او دا چې په اوسنۍ ټولنه کې د نبوی بیلګو یادونې ته اړتیا ده هم یو ښه فرصت وو.
